Sakoot-e-Shaam Main Goonji Sadaa

Sakoot-e-Shaam Main Goonji Sadaa Udaasi Ki,
Ke Hai Mazeed Udaasi Dawa Udaasi Ki,
Amoor-e-Dil Main, Kisi Teesre Ka Dakhal Nahi,
Yahan Faqat Teri Chalti Hai Ya Udaasi Ki,
Bohat Shareer Tha Main Aur Hansta Phirta Tha,
Phir Ek Faqeer Ne De Di Dua Udaasi Ki,
Charaagh-e-Dil Ko Zara Ehtiyaat Se Rakhna,
Ke Aaj Raat Chale Gi Hawa Udaasi Ki,
Bohat Dinon Se Mulakaat Hi Nahi “Mohsin,
Kahin Se Khair Khabar Le Ke Aa Udaasi Ki.

Wo Jo Khud Pairvi-E-Ehd-E-Wafa Karta Tha

Wo Jo Khud Pairvi-E-Ehd-E-Wafa Karta Tha,
Mujhse Milta Tha Tou Talqeen-E-Wafa Karta Tha,
Uske Daman Main Koi Phool Nahi Meray Liye,
Jo Meri Tangi-e-Damaa.n Ka Gila Karta Tha,
Aaj Jo Usko Bulaya Tou Wo Gumsum Hee Raha,
Dil Dhadaknay Ki Jo Awaz Suna Karta Tha,
Aaj Wo Meri Har Ek Baat Ke Maayni Poochay,
Jo Meri Soch Ki Tafseer Likha Karta Tha,
Uski Dehleez Par Sadiyon Se Khada Hoon “Mohsin,
Mujhsay Milnay Ko Jo Lamhaat Gina Karta Tha.

Apne aap se phirtey hain beganey

Apne aap se phirtey hain beganey kyon,
Sheher mein aakar log huye deewaney kyon,
Hum ne kab maani thi baat zamaney ki,
Aaj hamari baat zamana maaney kyon,
Woh jungle ke phoolon per kyon marta hai,
Us ko achey lagte hain veeraney kyon,
Sachi baat se ghabraney ki aadat kya,
Jhootey logon se apne yaraaney kyon,
Halwat* mein jo aankh milatey darta ho,
Mailey mein woh shakhss humain pehchaney kyon,
Mohsin jab bhi chott neyi kha leta hoon,
Dil ko yaad atey hain yaar puraney kyon.

Aaj Gum Sum Hai Jo Barbaad

Aaj Gum Sum Hai Jo Barbaad Jazeeron Jaisi,
Us Ki Aankhon Mein Chamak Thi Kabhi Heeron Jaisi,
Kitne Maghroor Pahaaron K Badan Chaak Howe,
Taiz Kirno Ki Jo Baarish Howi Teeron Jaisi,
Jis Ki Yaadon Se Khayaalon K Khazaane Dekhe,
Us ki Soorat Bhi Lagi Aaj Faqeeron Jaisi,
Chahatain Lab Pe Machalti Howi,
Larki Ki Tarah,
Hasratain Aankh Mein Zindaan Kay Aseeron Jaisi,
Hum Anaa Mast, Tahi Dast Bohot Hain Mohsin,
Yeh Alag Baat Kay Aadat Hai Ameeron Jaisi.

Page 1 of 612345...Last »